සභා නායක ලක්ෂ්මන් කිරිඇල්ල අමාත්‍යවරයා බෞද්ධයන්ගෙන් සමාව ගතයුතු බව ශ්‍රී ලංකා රාමඤ්ඤ මහා නිකායේ මාධ්‍ය ප්‍රකාශක ආචාර්ය පූජ්‍ය ඕමල්පේ සෝභිත නාහිමියෝ නිවේදනය කරති.
දිගන සිද්ධිය සම්බන්ධව අමාත්‍ය කිරිඇල්ල මහතා පාර්ලිමේන්තුවේදී කළ ප්‍රකාශය ගැන උන්වහන්සේ නිකුත් කළ නිවේදනය මෙසේය.
පසුගියදා දිගන හා අවට ප්‍රදේශවල සිදුවූ අවාසනාවන්ත භීෂණ ක්‍රියා සම්බන්ධයෙන් පාර්ලිමේන්තුවේදී ප්රකාශයක් කරමින් ලක්ෂ්මන් කිරිඇල්ල අමාත්‍යවරයා ප්රකාශයක් කරමින් කියා සිටියේ ඒ සිද්ධීන් පිළිබඳ බෞද්ධ ජනතාව මුස්‌ලිම් ජනයාගෙන් සමාව ගත යුතු බවයි.
ක්‍ෂණික කෝපය මුල්කරගෙන අසංවිධිත ප්‍රකෝපකාරී පිරිසක්‌ විසින් කරන ලද එම ත්‍රස්‌ත ක්‍රියාව කිසිසේත් බෞද්ධයන් විසින් සංවිධානාත්මකව කළ දෙයක්‌ නොවේ. එම එකලා සිද්ධිය පිළිබඳ සමස්‌ථ බෞද්ධ සමාජයටම චෝදනා කිරීම බරපතළ අපරාධයකි. මෙරටේ පමණක්‌ නොව විදේශ රටවල ජනතාව බරපතළ ලෙස නොමග යෑවීමකි. මේ නිසාම විශාල විපතක්‌ නුදුරේම සිදුවිය හැකිය. එනිසා කිරිඇල්ල අමාත්‍යවරයාගේ මේ අදූරදර්ශී, අමනෝඥ, උමතු චෝදනාව වහාම ඉල්ලා අස්‌කරගෙන, සමස්‌ථ බෞද්ධ ජනතාවගෙන්ම සමාව ඉල්ලා සිටිය යුතු බව ප්‍රකාශ කරමි.