ඉන්දියාවේ කාශ්මීර ප්‍රදේශයේදී ඉන්දීය හමුදා නිලධාරීන් පිරිසක් රැගත් රථ පෙළක් ඉලක්ක කර ඉකුත් දා එල්ල වූ ප්‍රහාරය අග්‍රාමාත්‍ය රනිල් වික්‍රමසිංහ මහතා දැඩි ලෙස හෙළා දැක තිබෙනවා.
ඉන්දීය අග්‍රාමාත්‍ය නරේන්ද්‍ර මෝදි වෙත ලිපියක් යොමු කරමින් අග්‍රාමාත්‍යවරයා පවසා ඇත්තේ, අදාළ ප්‍රහාරය පිළිබඳ පුවත අසා තමන් මහත් කම්පාවට පත්වූ බවයි.
මෙම කණගාටුදායක අවස්ථාවේ විපතට පත්වූවන්ගේ පවුල් සමග මෙන්ම ඉන්දීය රජය සමග ශෝකය බෙදා ගැනීමට තමන් මෙන්ම සමස්ථ ශ්‍රී ලංකා ප්‍රජාවද එක්ව සිටින බව එම ලිපියේ සඳහන්.
එමෙන්ම ත්‍රස්තවාදය පරාජය කිරීම සඳහා කලාපීය වශයෙන් මෙන්ම ජාත්‍යන්තර වශයෙන්ද ඕනෑම අවස්ථාවකදී ඉන්දියාව වෙත පූර්ණ සහය ලබාදීමට ශ්‍රී ලංකාව සූදානම් බවද අග්‍රාමාත්‍ය රනිල් වික්‍රමසිංහ මහතා ඉන්දීය අග්‍රාමාත්‍යවරයා වෙත යොමු කළ ලිපියේ වැඩිදුරටත් දැක්වෙනවා.