මැයි 11 වනදා සිට ජනජීවිතය හා ආයතන ක්‍රියාකාරිත්වය යථා තත්ත්වයට පත් කිරීමේ වැඩපිළිවෙළට සමගාමීව දිස්ත්‍රික් අතර ගමනාගමනය සිදුවිය යුතු ආකාරය සම්බන්ධයෙන් නව නීති රෙගුලාසි ප්‍රකාශයට පත් කිරීමට නියමිත බව නියෝජ්‍ය පොලිස්පති අජිත් රෝහණ මහතා පවසයි.
දැනට සමස්ත දිවයිනටම ක්‍රියාත්මක ඇඳිරි නීතිය එළැඹෙන මැයි 11 වන දින අලුයම 5 දක්වා බලපැවැත් වෙයි.
මැයි 11 වනදා සිට ජන ජීවිතය හා ආයතන ක්‍රියාකාරිත්වය යථා තත්ත්වයට පත් කිරීමේ වැඩපිළිවෙළ ආරම්භ කිරීමට නියමිත අතර ඒ පිළිබඳව විශේෂ රෙගුලාසිද රජය විසින් මේ සතිඅන්තයේදී ප්‍රකාශයට පත් කිරීමට නියමිතයි.
රාජකාරි සඳහා වාර්තා කරන ජනතාවට අවශ්‍ය ප්‍රවාහන පහසුකම් පුළුල් කිරීම සඳහා ශ්‍රී ලංකා ගමනාගමන මණ්ඩලය මේ වන විටත් සූදානමින් සිටින බව එහි සභාපති කිංස්ලි රණවක මහතා සඳහන් කළේය.
මැයි 11 වනදා සිට ක්‍රියාත්මක කෙරෙන නව වැඩපිළිවෙළ පිළිබඳව නියෝජ්‍ය පොලිස්පති අජිත් රෝහණ මහතා කියා සිටියේ, අත්‍යාවශ්‍ය සේවා සඳහා දිස්ත්‍රික් මායිම් පසුකර කොළඹ පැමිණිම සම්බන්ධයෙන් විශේෂ ක්‍රමවේදයක් මේ වන විටත් සකස් කර අවසන් බවයි.
කෙසේ වෙතත් මේ සම්බන්ධයෙන් වු නීති හා රෙගුලාසි ඉදිරියේ දී ප්‍රකාශයට පත් කරන බවද ඒ මහතා පැවසීය.