ආන්දෝලනයට තුඩු දී ඇති මාළඹේ පෞද්ගලික වෛද්‍ය විද්‍යාලයේ සිසුන්ට රජයේ රෝහල්වල සායනික පුහුණුව ලබා දීමට සෞඛ්‍ය අමාතශ්‍යාංශය එකග වී තිබේ.
මීට පෙර සෞඛ්‍ය අමාත්‍යවරයාට සහ සෞඛ්‍ය ලේකම්වරයාට අධිකරණ නියෝගයක් ලබා දී තිබුනේ අදාළ ආයතනයේ සිසුන්ට සායනකික පුහුණුව ලබා දීමට කටයුතු කරන ලෙසටයි. එහෙත් එම නියෝගය ක්‍රියාත්මක නොවන බවට සිසුන් පස් දෙනෙකු විසින් ශ්‍රේෂ්ඨාධිකරණය හමුවේ පැමිණිල්ලක් ගොණුකර තිබුණු අතර අද එය විභාගයට ගනු ලැබුවා.
එහිදී නීතිපතිවරයා වෙනුවෙන් පෙනී සිටි රජයේ නීතිඥවරිය කියා සිටියේ කඩුවෙල සහ අවිස්සාවේල්ල වෛද්‍ය නිලධාරී බල ප්‍රදේශ තුල ඇති රෝහල්වල සායනික පුහුණුව ලබාදීමට එකගතාව පළකරන බවයි. කෙසේවෙතත් එම පුහුණුව ලබාදෙනු ලබන්නේ රුපියල් පනස් දහසක මුදලකට යටත්ව බව ද රජයේ නීතිඥවරිය ප්‍රකාශකර තිබෙනවා.
මේ අතර මාළඹේ පුද්ගලික වෛද්‍ය විද්‍යාලයේ සිසුන්ට රජයේ රෝහල්වල සායනික පුහුණුව ලබා නොදෙන ලෙස සහ එම වෛද්‍ය විද්‍යාලය තහනම් කරන ලෙස බලකරමින් ඊයේ දිනයේදීද අන්තර් විශ්ව විද්‍යාල ශිෂ්‍ය බලමණ්ඩලය විසින් කොළඹදී විරෝධතාවක් පවත්වනු ලැබූ අතර මාධ්‍ය හමුවක් කැදවමීන් රජයේ වෛද්‍ය නිලධාරී සංගමයද එම පෞද්ගලික වෛද්‍ය සිසුන්ට රජයේ රෝහල්වල සායනික පුහුණුව ලබා දීමට විරුද්ධත්වය ප්‍රකාශ කර තිබුණා.