මාස දෙකකට අධික කාලයකට පසු ඇමරිකානු ඩොලරයක විකුණුම් මිල යළිත් රුපියල් 178 සීමාවට ඊයේ (05) පැමිණියේය.
ශ්‍රී ලංකා මහ බැංකුවේ දෛනික විනිමය අනුපාත සටහනට අනුව ඊයේ දිනයේ ඇමරිකානු ඩොලරයක විකුණුම් මිල රුපියල් 178.8381ක් ලෙස සටහන් වූ අතර ඇමරිකානු ඩොලරයක ගැනුම් මිල සටහන් වූයේ රුපියල් 174.9847 ක් ලෙසය.
ඇමරිකානු ඩොලරයක විකුණුම් මිල රුපියල් 179 සීමාවෙන් පහළට අද පැමිණියේ 2018 නොවැම්බර් 21 වනදායින් පසුවය.
පසුගිය වසරේ දේශපාලන අර්බුදය නිර්මාණය කෙරුණු ඔක්තෝබර් 26 වනදා වනවිට ඩොලරයක විකුණුම් මිල පැවතියේ රුපියල් 174.4421ක් ලෙසය. මෙතෙක් ඉතිහාසයේ ඩොලරයක් සඳහා වූ ඉහළම විකුණුම් මිල ලෙස රුපියල් 184.6966ක් සටහන් වූයේ 2018 දෙසැම්බර් 31 වනදාය.
2019 ජනවාරි 30 වනදා වනවිටත් ඩොලරයක විකුණුම් මිල රුපියල් 182.7033ක් වූ අතර පසුගිය සතිය තුළ ඩොලරයෙහි මිල පහළ බස්වමින් රුපියල සීඝ්‍රයෙන් ශක්තිමත්ව ඇති බව පෙනේ.