විල්පත්තු වන විනාශය හෙළි කිරීම හේතුවෙන් තමාගේ කිර්ති නාමයට හානි වූ බව පවසමින් හිටපු අමාත්‍ය රිෂාඩ් බදුර්දීන් විසින් බොදු බල සේනා සංවිධානයේ මහ ලේකම් රාජකීයපණ්ඩිත ගලගොඩඅත්තේ ඥානසාර හිමිගෙන් වන්දි ඉල්ලා ගොනු කර ඇති නඩුව නැවත කැඳවීම සඳහා ජූලි 29 දක්වා කල් තිබීමට කොළඹ දිස්ත්‍රික් අධිකරණය විසින් අද (20) නියෝග කර සිටියා. ඒ අද එම නඩුව නැවත කැඳවූ අවස්ථාවේදීයි.
පැමිණිලිකාර රිෂාඩ් බදුර්දීන් වෙනුවෙන් ඉදිරිපත් වූ නීතිඥ හිස්බුල්ලා, පැමිණිලිකරු වෙනුවෙන් ඉදිරිපත් වන ජනාධිපති නීතිඥ නවීන් මාරපනට අද ඉදිරිපත් වීමට අපහසු බැවින් වෙනත් දිනයක් ලබාදෙන මෙන් ඉල්ලා සිටියා.
විත්තිකාර පුජ්‍ය ගලගොඩ ඥානසාර හිමි වෙනුවෙන් ජ්‍යෙෂ්ඨ නීතිඥ හේමක සේනානායක, නීතිඥ සංජය මාරඹේ සහ නීතිඥ මනෝහර සිල්වා යන මහත්වරු පෙනී සිටින ලදි.