අයාලේ යන වෘත්තීය සටන්වලට ඒකාබද්ධ වෘත්තීය සමිති බල මණ්ඩලය සම්බන්ධ නොවන බව එහි කැඳවුම්කරු ඩබ්ලිව්. එම්. පියදාස මහතා පැවසීය.
මේ ආණ්‌ඩුව බලයට ගෙන ඒමට කටයුතු කළ වෘත්තීය සමිති පිළිබඳ කිසිදු විශ්වාසයක්‌ නැති බවත් අගමැතිවරයාගේ ප්‍රකාශය පදනම් කරගෙන තීරණය කර තිබූ වෘත්තීය ක්‍රියා මාර්ගය හකුලා ගන්නා බව කීමෙන් තමන් පුදුමයට පත්වූ බවත් හෙතෙම කියා සිටියේය.
මෙම අයවැය සම්බන්ධව මතුවන විරෝධතා වලට බියෙන් ආණ්‌ඩුව විවිධ ප්‍රකාශන නිකුත් කරන බවත්, පාර්ලිමේන්තුවේ කෙරෙන ප්‍රකාශවලින් පමණක්‌ සෑහීමකට පත්විය නොහැකි බවත් ඒවා අයවැය සංශෝධනවලට ඇතුළත් කර සම්මත විය යුතු බවත් කීවේය.
ආණ්‌ඩුවට කත් අදින වෘත්තීය සමිති සටන ආපසු හරවගන්න අගමැතිවරයාගේ ප්‍රකාශය හේතුවක්‌ කරගත් බව පැවසූ පියදාස මහතා ඒකාබද්ධ වෘත්තීය සමිති බල මණ්‌ඩලයේ සටන ජනතාවට අහිතකර අයවැය යෝජනා සංශෝධනය කරන තුරු ඉදිරියට ගෙන යන බවත් ඒකාබද්ධ වෘත්තීය සමිති බල මණ්ඩලය කලින් තීරණය කළ පරිදි අයවැයට විරුද්ධව විරෝධතාව ලබන 18 වැනිදා පවත්වන බවත් කීවේය.