එක්සත් ජාතික පක්ෂයේ නායක රනිල් වික්‍රමසිංහ මහතා සමඟ එ. ජා. ප මන්ත්‍රීවරුන් වන තමන්ට ද ප්‍රශ්න තිබෙන බව පාර්ලිමේන්තු මන්ත්‍රී රන්ජන් රාමනායක මහතා ප්‍රකාශ කළේය.
මහින්ද රාජපක්ෂ මහතා මෙන් නොව රනිල් වික්‍රමසිංහ මහතා තමන් සමඟ හිනා නොවන බවත් කතා නොකරන බවත් සුහද නැති බවත් රාමනායක මහතා ඊයේ(19) පැවැති මාධ්‍ය හමුවක දී පැවැසීය. එහෙත් මහින්ද රාජපක්ෂ මහතා එ. ජා. ප මන්ත්‍රීවරුන් දුටු විගස සිනාසෙමින්, වැළඳ ගනිමින් ඉතා සුහදව කටයුතු කරන බවත් මහින්ද රාජපක්ෂ යනු ඉතා මිත්‍රශීලී චරිතයක් බවත් රාමනායක මහතා කීවේය.
වික්‍රමසිංහ මහතා සමඟ අරලියගහ මන්දිරයේ දී ඉතා කිට්ටුවෙන් ආශ්‍රය කළ ද ගමේ හිතවතකුගේ මංගල්‍ය උත්සවයකට පැමිණි විට තමා කිසිවිටෙකත් අහළකටවත් නොයන බවත් රාමනායක මහතා පැවැසීය.
එවැනි අවස්ථාවක ඉතා සමීපව ඇසුරු කරන අයකු වුව ද නොහඳුනන සේ අහක බලාගෙන යාම වික්‍රමසිංහ මහතාගේ පුරුද්ද බව පැවසූ රාමනායක මහතා එසේ වූ විට ගමේ මිනිස්සු නගන ප්‍රශ්නවලට උත්තර නොමැති බැවින් තමන් ඔහු ළඟට නොයන බවත් පැවැසීය.