සජිත්ගේ එජාප රැස්වීමේදී ඔවුන් කළේ රාජපක්ෂලාට මඩ ගැසීම මිස පසුගිය වසර හතර හමාරක කාලය තුළ ඔවුන් කළ දේවල් පිළිබඳව නොවන බව හිටපු ජනාධිපති, විපක්ෂ නායක මහින්ද රාජපක්ෂ මහතා පවසයි. තමන්ගේ රජයෙන් ජනතාව වෙනුවෙන් කිසිවක් සිදු නොකළ එජාපයට මඩ ගැසීම හැර කරන්නට වෙනත් දෙයක් නොමැති බවයි රාජපක්ෂ මහතා වැඩිදුරටත් පවසන්නේ.
මෙම ආණ්ඩුව, ජනතාවට සිල්රෙදි ලබාදීම නිසා ජනාධිපති ලේකම්වරයෙකු හිරේ දැමූ ආණ්ඩුවක් බවත් ගාමිණී සෙනරත් මහතාට දඬුවම් දීමෙන් පසු අධිකරණය විසින් නිදොස් කොට නිදහස් වූ බවත් හිටපු ජනාධිපතිවරයා පෙන්වා දෙයි.
ජනතාවට මුහුණ දීගත නොහැකි ආණ්ඩුව ප්‍රජාතන්ත්‍රවාදී අයිතීන් අහිමි කරමින් මැතිවරණ කල්දැමීමට කටයුතු කළ බවත් ජනාධිපතිවරණයට කල්දමා ගත නොහැකි වූ තැන ගෝඨාභය රාජපක්ෂ මහතාගේ ඡන්ද කැඩීම සඳහා අපේක්ෂකයන් 35 දෙනෙකු ඉදිරිපත් කර තිබෙන බව ද රාජපක්ෂ මහතා පවසයි. කුමන උපක්‍රම යෙදුවද ගෝඨාභය රාජපක්ෂ මහතාගේ ජයග්‍රහණය නැවැත්වීමට කිසිවෙකුට නොහැකි බවයි ඔහු පෙන්වා දෙන්නේ.