ගන්දර පොලිස් ස්ථානයේ සිරමැදිරියක රඳවා සිටි සැකකරුවෙකුට වෙඩි වැදී තුවාල ලැබිමේ සිද්ධිය සම්බන්ධයෙන් පොලිස් අධිකාරිවරයෙකුගේ ප්‍රධානත්වයෙන් විමර්ශනයක් ආරම්භ කර තිබේ.
පොලිස් මාධ්‍ය ප්‍රකාශක නියෝජ්‍ය පොලිස්පති අජිත් රෝහණ මහතා පැවසුවේ, මත්ද්‍රව්‍ය චෝදනා යටතේ අත්අඩංගුවේ පසුවු 30 හැවිරිදි සැකකරුවෙකු වෙඩි වැදිමේ තුවාල සහිතව මාතර රෝහලට ඇතුළත් කර ඇති බවය.
ගන්දර පොලිස් ස්ථානයේ දී සිය ගිනි අවියේ පතොරම් ඉවත් කිරීමට යාමේ දි අහඹු ලෙස උණ්ඩයක් පිටවු බවට සිද්ධියට සම්බන්ධ පොලිස් සැරයන්වරයා ප්‍රකාශයක් සිදුකර ඇති බව නියෝජ්‍ය පොලිස්පති අජිත් රෝහණ මහතා සඳහන් කළේය.
කෙසේවෙතත් පොලිස් විනය සංග්‍රහය යටතේ වහාම ක්‍රියාත්මක වන පරිදි ඔහුගේ වැඩ තහනම් කිරීමට පියවර ගෙන තිබේ.
වෙඩි වැදුණු සැකකරුගේ තත්ත්වය බරපතළ නොවන අතර සිද්ධිය සම්බන්ධයෙන් දකුණු පළාත් ජ්‍යෙෂ්ඨ නියෝජ්‍ය පොලිස්පතිවරයාගේ උපදෙස් මත පුළුල් විමර්ශනයක් ආරම්භ කර ඇති බව පොලිස් මාධ්‍ය ප්‍රකාශකවරයා පැවසුවේය.