නීතිවිරෝධී ලෙස මෙරටට රැගෙන ඒමට උත්සාහ කළ කහ කිලෝ 902 කට අධික තොගයක් සමග සැකකරුවන් දෙදෙනෙකු නාවික හමුදාව මගින් අත්අඩංගුවට ගෙන තිබෙනවා. ඒ, උතුරු මැද නාවික විධානයේ නාවිකයින් මන්නාරම තල්පාඩු වෙරළ තීරයේ සිදු කළ සෝදිසි මෙහෙයුමකදීයි.
තල්පාඩු වෙරළ තීරයට පැමිණි සැක සහිත ඩිංගි යාත‍්‍රාවක් පරීක්ෂා කිරීමේදී එම යාත‍්‍රාවේ තිබී ගෝනි 19 ක අසුරා තිබූ එම කහ තොගය සොයාගෙන ඇති බවයි නාවික හමුදාව පැවසුවේ. අත්අඩංගුවට ගැනුණු සැකකරුවන් දෙදෙනා නිරෝධායන කටයුතු සඳහා මන්නාරම සෞඛ්‍ය වෛද්‍ය නිලධාරීවරයා වෙත භාර දී ඇති අතර නිරෝධායන කටයුතු අවසන් කිරීමෙන් පසු ඉදිරි පරීක්ෂණ සඳහා යාපනය රේගු කාර්යාලය වෙත භාර දීමට නියමිත බවයි නාවික හමුදාව වැඩිදුරටත් සඳහන් කළේ.