ජාතික නිදහස් පෙරමුණේ නියෝජ්‍ය නායක, එක්සත් ජනතා නිදහස් සන්ධාන පාර්ලිමේන්තු මන්ත්‍රී වීරකුමාර දිසානායක මහතා නීතිය හා සාමය රාජ්‍ය අමාත්‍ය ධුරයට පත් කිරීමට ජනාධිපති මෛත්‍රීපාල සිරිසේන මහතා තීරණය කර ඇති බව රජයට හිතවත් අන්තර්ජාල මාධ්‍ය වාර්තා කර තිබේ.
ඒකාබද්ධ විපක්ෂය නියෝජනය කරන තවත් කිහිප දෙනෙකු ඉදිරියේදී රජයට එක්වීමට සූදානමින් සිටින බවත්, ඔවුන්ටද රාජ්‍ය ඇමතිධුර සහ නියෝජ්‍ය ඇමතිධුර ලබා දීමට නියමිත බවත් එම වාර්තා පවසයි.
මේ අතර ජාතික නිදහස් පෙරමුණ ශ්‍රී ලංකා නිදහස් පක්ෂය සමග එක්ව ඉදිරි මැතිවරණයට තරග කළ යුතුයැයි වීරකුමාර දිසානායක මහතා ප්‍රකාශ කර තිබේ.
මේ අවස්ථාවේදී ඒකාබද්ධ විපක්ෂයට නොව රටට ජයග්‍රහණ අත්පත් කරදීම ගැන සිතිය යුතු බවත්,රටට ජයග්‍රහණ අත්පත්කර දීමේදී ශ්‍රී ලංකා නිදහස් පක්ෂය සමග එක්වීම අවශ්‍ය බවද හෙතෙම කියා සිටී.
ජාතික නිදහස් පෙරමුණේ ජයන්ත විජේසේකර මන්ත්‍රීවරයාද පසුගියදා ශ්‍රී ලංකා නිදහස් පක්ෂය සමග එක්විය.