නුගේගොඩ ගම්සභා හන්දියේ පිහිටි රූපලාවන්‍යාගාරයක්‌ තුළදී ටෙලි නාට්‍ය නිළි හංසි සිතාරා නමැත්තියට පහර දී ඇය සතු රුපියල් විසිදහසක්‌ පමණ වටිනා ජංගම දුරකථනයක්‌ සොරාගත් බව කියන සිද්ධියක්‌ සම්බන්ධයෙන් ඇප මත මුදාහැර සිටින ජනප්‍රිය ටෙලි නාට්‍ය හා චිත්‍රපට නිළි ආක්ෂා සුදාරි නමැත්තියට වරෙන්තු නිකුත් කරන ලෙස නුගේගොඩ ප්‍රධාන මහෙස්‌ත්‍රාත් හා අතිරේක දිසා විනිසුරු කණිෂ්ක විඡේරත්න මහතා පසුගියදා (25 වැනිදා) නියෝග කළේය.
එම පහරදීමේ සිද්ධිය සම්බන්ධයෙන් චෝදනා ලැබ සිටින දෙවැනි හා තෙවැනි සැකකාරියන්වන ටෙලි නාට්‍ය හා චිත්‍රපට නිළි මේනකා මධුවන්ති හා මොහිදින් වහීදා යන දෙදෙනා එදින නඩුව කැඳවූ අවස්‌ථාවේදී අධිකරණය හමුවේ පෙනී සිටි නමුත් එම සිද්ධියේ පළමු සැකකාරිය වන ආක්ෂා සුදාරි අධිකරණය මඟහැර සිටීම නිසා ඇයට එසේ වරෙන්තු නිකුත් කෙරිණි.
ටෙලි නාට්‍ය නිළියක්‌ වන උඩහමුල්ල ප්‍රදේශයේ පදිංචි හංසි සිතාරා නමැත්තිය 2013 ඔක්‌තෝබර් 10 වැනිදා මිරිහාන පොලිසියට කරන ලද පැමිණිල්ලක්‌ අනුව අත්අඩංගුවට ගත් ඉහත කී සැකකාරියන් තිදෙනා දැනට ඇප මත මුදා හැර තිබෙන අතර මෙම සිද්ධියේ තෙවැනි සැකකාරිය වන මොහිදීන් වහීදා පළමු සැකකාරිය වන ආක්ෂා සුදාරි නමැත්තියගේ මව වෙයි.