මේ වසරේ (2017) අප්‍රේල් මාසයේ රජයේ සේවකයන්ට වැටුප් හා විශ්‍රාම වැටුප් ගෙවීමට රුපියල් කෝටි 6000ක භාණ්ඩාගාර බිල්පත් මුදල් අමාත්‍යංශය විසින් මහ බැංකුවට විකුණා ඇතැයි වාර්තා වේ.
භාණ්ඩාගාර බිල්පත්වලට මහ බැංකුවෙන් මුදල් ලබාදීමේදී සිදුවන්නේ අලුතින් මුදල් නෝට්ටු මුද්‍රණය කිරීම යැයි මහ බැංකුවේ ජ්‍යෙෂ්ඨ ප්‍රකාශකයෙක් පැවසීය.
අප්‍රේල් මාසයේ දෙවැනි සතියේ අවුරුදු උත්සවය නිමිත්තෙන් රජයේ සේවකයන්ට වැටුප් හා විශ්‍රාමිකයන්ට විශ්‍රාම වැටුප් ගෙවීම සිදුවිය.
ඒ සඳහා මසකට රජය රුපියල් කෝටි 7500ක් පමණ වැයකරන බව පැවසේ. ඉන් කෝටි 1500ක් පමණ මාසිකව භාණ්ඩාගාරයට ලැබෙන සිගරුට් හා සෙසු බදු ආදායම් වලින් උපයා ගැනේ.
එහෙත් තවත් රුපියල් කෝටි 6000ක් පමණ හදිසියේ අත්‍යවශ්‍ය වූ නිසා මෙසේ මුදල් මුද්‍රණය කොට ලබාගන්නට සිදුව ඇතැයි සඳහන්ය.