පසුගිය රජය යටතේ විරෝධතාවලට එල්ල වූ වෙඩි ප්‍රහාර වත්මන් ආණ්ඩුව යටතේ ජල ප්‍රහාර බවට පරිවර්ථනය කරන්න හැකි වී තිබෙන බව නිපුණතා සංවර්ධන හා වෘත්තීය පුහුණු රාජ්‍ය ඇමති පාලිත රංගේ බණ්ඩාර මහතා පවසයි.
අද විරෝධතා කරන්නට නිදහස ලබා දී තිබෙනවා සේම විරෝධතා දිනෙන් දින ඉහළ යාමක්ද දක්නට ලැබෙන බවද ඔහු පවසයි. රට තුළ ඇති වී තිබෙන නිදහස කොතරම්දැයි එමගින් පැහැදිලි වන බවත්, මේ බව අවබෝධ කර ගැනීම සියළු දෙනාගේ වගකීමක් බවත් අමාත්‍යවරයා පෙන්වා දෙයි.
“රජයට විරුද්ධව විරෝධතාවල නිරත වෙන්න අද ඕනෑම කෙනකුට පුළුවන්. අපි බලපෑම් කරන්නේ නෑ. මාර්ග අවහිර වීම ඇතුළු යම් යම් කාරණා මත ජල ප්‍රහාරයක් කදුළු ගෑස් ප්‍රහාරයක් එල්ල වෙනවා. නමුත් රතුපස්වලට, කටුනායකට, හලාවතට එල්ල වුණා වගේ වෙඩි ප්‍රහාර එල්ල වෙන්නේ නෑ. මේ තමයි වෙනස. වෙනස සතුටුද අහන අයට අපි උත්තර දෙමු. ඔව් වෙනස සතුටුයි. ධීවරයෝ මරපු, විරෝධතාවයේ නිරත රතුපස්වලට වෙඩි තියපු, විශ්‍රාම වැටුප රැක ගන්න පාරට බැහැපු කටුනායක තරැණයින්ට වෙඩි තියපු ආණ්ඩුවක හිටපු හැම කෙනෙකුම මේ වෙනසට ඊරිසියා කරනවා“