කථානායක කරු ජයසූරිය මහතාගේ ප‍්‍රධානත්වයෙන් අද (23) පැවැත්වෙන පක්ෂ නායක රැස්වීමේදී හෝ සිය ඉල්ලීම්වලට යහපත් ප‍්‍රතිචාරයක් නොලැබුණහොත් අයිතිවාසිකම් දිනාගැනීම සඳහා පාර්ලිමේන්තුවේදී තවදුරටත් අරගල කරන බව ඒකාබද්ධ විපක්ෂය පවසනවා.
පාර්ලිමේන්තු මන්ත‍්‍රී දිනේෂ් ගුණවර්ධන මහතා කියා සිටියේ මෙම පක්ෂ නායක රැස්වීමෙන් පසු පස්වරුවේ ඒකාබද්ධ විපක්ෂයේ මන්ත‍්‍රී කණ්ඩායම ද වෙනම රැස්වන බවයි.
මේ අතර නව ආණ්ඩුක්රම ව්‍යවස්ථාවක් සකස් කිරීම සඳහා ආණ්ඩුක්රම ව්‍යවස්ථා මණ්ඩලයක් පත්කිරීම සම්බන්ධයෙන් වන පාර්ලිමේන්තු විවාදය අද ආරම්භ වනවා.
අද (23) සහ හෙට (24) මෙම විවාදය සිදුකෙරෙනු ඇති. අදාළ යෝජනාව අග‍්‍රාමාත්‍ය රනිල් වික‍්‍රමසිංහ මහතා විසින් පාර්ලිමේන්තුවට ඉදිරිපත් කෙරුණා. කරුණු 33ක් ඊට ඇතුළත්.
ආණ්ඩුක්රම ව්‍යවස්ථා මණ්ඩලයේ සභාපතිවරයා ලෙස කථානායකවරයා පත්විය යුතු බව එහි සඳහන් එක් කරුණක් වනවා. එම යෝජනාව විවාදයට ගැනීමට මීට පෙර ද අවස්ථා කිහිපයකදී දින නියම කෙරුණත් පක්ෂ විපක්ෂ මතගැටුම් හේතුවෙන් එය කල්දැමුණා.