ෆේස්බුක් හරහා ජාතින් අතර සමගිය කඩවන ආකාරයෙන් ප්‍රකාශ නිකුත් කළ බවට සැකපිට අත්අඩංගුවට ගත් කොළඹ ප්‍රධාන පෙළේ පාසලක සිසුවෙකු ට ඇප ලබාදීම ප්‍රතික්ෂේප කළ කොළඹ මහේස්ත්‍රාත් අධිකරණය සැකකරු ලබන මස 9 වන දා දක්වා රිමාන්ඩ් භාරයේ තැබීමට නියම කර තිබේ.
සැකකාර සිසුවා මුස්ලිම් ජාතිකයෙකු බවත් , ඔහු සිංහල නමකින් පෙනීසිට ෆේස්බුක් මාධ්‍ය හරහා ජාතින් අතර සමගිය කඩවන ආකාරයෙන් ප්‍රකාශ නිතුත් කිරීමේ වරදක් සිදුකර ඇතැයි රහස් පොලිසිය විසින් සැකපිට අත්අඩංගුවට ගෙන ඇත.
එම නඩුව අද(26) කොළඹ අතිරේක මහේස්ත්‍රාත් චානිමා විජේබණ්ඩාර මහත්මිය හමුවේ කැඳවූ අවස්ථාවේදී සැකකාර සිසුවා වෙනුවෙන් පෙනී සිටි නීතිඥවරු අධිකරණය වෙත ඇප ඉල්ලීමක් ඉදිරිපත් කර ඇති අතර එහිදී මහේස්ත්‍රාත්වරිය සඳහන් කළේ සැකකරුට එරෙහිව සිවිල් හා දේශපාලන අයිතිවාසිකම් පිළිබඳ සම්මුති පනත යටතේ කරුණු ඉදිරිපත් කර ඇති බැවින් ඇප ලබාදීමට අධිකරණයට බලයක් නොමැති බවයි.
ඒ අනුව ඇප ඉල්ලීම ප්‍රතික්ෂේප කළ මහේස්ත්‍රාත්වරිය සැකකරු ලබන 9 දක්වා රිමාන්ඩ් භාරයේ තැබීමට නියම කර තිබේ.