ජිනීවා යෝජනා සම්බන්ධයෙන් ඉදිරියේ දී ක්‍රියා කළ යුතු ආකාරය පිළිබඳව සියලුම දේශපාලන පක්‍ෂ, විසඳුම් සහිත යෝජනා ඉදිරිපත් කරන ලෙස ඊයේ (22 වැනිදා) ජනාධිපති ලේකම් කාර්යාලයේ පැවැති සර්ව පාක්‍ෂික සමුළුවට සහභාගිවූ පක්‍ෂ නායකයන්ගෙන් ජනාධිපති මෛත්‍රීපාල සිරිසේන මහතා ඉල්ලා සිටියේය.
ජනාධිපති ලේකම් කාර්යාලයේ පැවැති මෙම පක්‍ෂ නායක සමුළුවට පාර්ලිමේන්තුව නියෝජනය කරන දේශපාලන පක්‍ෂ 21 කට ආරාධනා කර තිබූ අතර භික්‍ෂුන් වහන්සේලා සිව් නමක්‌ද කාන්තාවන් දෙදෙනකු ඇතුළුව දේශපාලන පක්‍ෂ නායකයින් ලෙස 87 දෙනෙක්‌ පමණ සමුළුවට සහභාගි වී සිටියහ. මෙහිදී අදහස්‌ දැක්‌වූ ජනාධිපතිවරයා මෙසේ කීවේය.
“ජිනීවා යෝජනාවට අනුව ශ්‍රී ලංකා රජය සහ එල්.ටී.ටී.ඊ. සංවිධානය මගින් යුද සමයේ කටයුතු කළ ආකාරය විමර්ශනය කළ යුතුව තිබෙනවා. මේ ගැන මාධ්‍යය මගින් විවිධ විවේචන ඉදිරිපත් කර තිබෙනවා. විවේචන, විග්‍රහ කිරීම් පහසු වුවත් විසඳුම් සොයා ගැනීම අසීරුයි. මේ පක්‍ෂ නායක සමුළුවෙන් අපි බලාපොරොත්තු වන්නේ මෙම යෝජනා සම්බන්ධයෙන් අපි රටක්‌ විදිහට ප්‍රජාතන්ත්‍රවාදීව ආණ්‌ඩුක්‍රම ව්‍යවස්‌ථාවට අනුකූලව විසඳුම් සොයා ගැනීමයි. ඒ සඳහා වාචිකවත්, ලිඛිතවත් විසඳුම් යෝජනා ඉදිරිපත් කරන්න පුළුවන්. ඉදිරි සති දෙක ඇතුළත ලිත විසඳුම් යෝජනා ලබාදෙන ලෙසද ජනාධිපති ලේකම් කාර්යාලය මෙම පක්‍ෂ නායක සමුළුවේ ලේකම් කාර්යාලයක්‌ ලෙස කටයුතු කරන බවද ජනාධිපතිවරයා කීවේය.
මෙම සමුළුවට විමල් වීරවංශ මහතා සහභාගි නොවීමද කැපී පෙනුණි. සභාවේ ජනාධිපතිවරයාගේ ප්‍රකාශයෙන් පසුව ශාලාවෙන් පිටතට ගොස්‌ මෙම සාකච්ඡාවට සහාය ලබාදෙන ලෙස ජනාධිපතිවරයා මාධ්‍යවේදීන්ගෙන් ඉල්ලා සිටියේය. ඒ අනුව මාධ්‍යවේදීන් පස්‌වරු 5.40 ට පමණ ජනාධිපති ලේකම් කාර්යාලයෙන් පිටතට පැමිණියහ.