එක්සත් ජාතික පක්ෂය තුළ වැඩ කළ හැකි තරුණ නායකයින් සිටියද, ඒ සඳහා පක්ෂය තුල අවස්ථාවක් හිමි නොවන බව ජාත්‍යන්තර වෙළඳ අමාත්‍ය සුජීව සේනසිංහ මහතා පවසයි.
අමාත්‍යවරයා මේ බව ප්‍රකාශ කර සිටියේ මහරගම පැවති උත්සවයකින් අනතුරුව ය. වැඩිදුරටත් අදහස් දැක්වූ එම මහතා කියා සිටියේ තමාට හිමි රාජ්‍ය ඇමති ධූරය සමථ මණ්ඩලයේ සභාපති ධූරයක් වැනි අමාත්‍යාංශයක් බවයි. ඉන් තමාට කිසිවක් කිරීමට ඉඩ නොලැබෙන බවත් රටට කිසිවක් කිරීමට හැකියාවක් නොමැති බව ද පැවසී ය.
පවතින ආණ්ඩුව නිර්මාණය කිරීමේදී මෛත්‍රිපාල සිරිසේන මහතා හෝ රනිල් වික්‍රමසිංහ මහතාට වඩා විශාල කාර්යභාරයක් තමා වැනි තරුණ නායකයින් ඉටු කල බවත් මේ වන විට ඔවුන් නොසලකා හැර ඇති බවත් සුජීව සේනසිංහ මහතා පවසයි. එසේම පක්ෂයෙන් ඉවත්වසිට නැවත පක්ෂයට සම්බන්ධ වූ පුද්ගලයන්ට පක්ෂය තුළ ලැබෙන පිළිගැනීමවත් තරුණ නායකයන්ට නොලැබෙන බව ඔහු පවසයි.
එසේම පක්ෂය ගැන කලකිරීමෙන් සිටින බවත් පක්ෂයේ අනාගතය පිළිබඳ කණගාටුවන බවත් සේනසිංහ මහතා පවසයි.