කොරෝනා මෘතදේහ භූමිදානය ගැන කැබිනට් එක තීන්දුවක් නොගත් බවත් අනවශ්‍ය ආන්දෝලනයක් ඇති කලේ අධිකරණ ඇමති අලි සබ්‍රිගේ Facebook සටහනක් බවත් අමාත්‍ය විමල් වීරවංශ මහතා ඊයේ (12) සඳහන් කර සිටියා.
මෙහිදී අමාත්‍ය විමල් වීරවංශ අදහස් දැක්වූ අදහස්….
“කොරෝනා හැදිච්ච මුස්ලිම් මෘතදේහ භූමිදානය කිරීම ගැන තීන්දු ගත්තේ කැබිනට් මණ්ඩලය නොවෙයි. ඒ තීන්දුව ගත්තේ මේ රටේ සෞඛ්‍ය අංශයේ ඉන්න විශේෂඥ කණ්ඩායමකගේ අවබෝධය ඇතුව. එතකොට ඒ විශේෂඥ කමිටුව තමයි ඒ තීරණය නැවත සලකා බලනවද නැද්ද කියලා තීරණය කරන්න ඕන.”
“අමාත්‍ය මණ්ඩලය තුල මේ පිළිබඳව සාකච්ඡාවක් සිද්ධ උනා. නමුත් කිසිම තීන්දුවක් ගත්තේ නෑ. දැනට අරන් තියෙන තීරණය වෙනස් කරන්න තීරණයක් ගත්තේ නෑ. ඉතින් අවාසනාවට අධිකරණ ඇමති තුමා තමාගේ සමාජ මාධ්‍ය මගින් එවැනි තීරණයක් ගත් බවට ඇඟවෙන විදිහේ සටහනක් තබලා තිබුනා. ඒක නිසයි මේ අනවශ්‍ය ආන්දෝලනයක් ඇති වුනේ.”