ලොව ප්‍රථම ගූගල් බැලුන ව්‍යාපෘතිය තව ටික දිනකින් මෙරටදී ආරම්භ කරන බව විදුලි සංදේශ හා ඩිජිටල් යටිතල පහසුදම් අමාත්‍ය හරීන් ප්රනාන්දු මහතා පවසයි. ඊයේ (01) නාරාහේන්පිට ශ්‍රී ලංකා තොරතුරු සංනිවේදන නියෝජිත ආයතනයේ (ICTA) පැවැති මාධ්‍ය හමුවකට එක්වෙමින් අමාත්‍යවාරයා පැවසූවේ එම නිසා මුළු ලෝකයේම අවධානය ශ්‍රී ලංකාවට යොමු වන බවයි.
අමාත්‍ය හරීන් ප්රනාන්දු මහතා ඇතුළු පිරිස අමෙරිකාවේ කැලිෆෝනියා ප්‍රාන්තයේ කළ සංචාරයකදී කළ සාකච්ඡා හේතුවෙන් තොරතුරු සංනිවේදනයේ දැවැන්තයන් මෙරට ආයෝජනයට කැමැත්ත පළ කළ බවද මෙහිදී පැවසුවා. ගූගල් බැලුන් ව්‍යාපෘතියෙන් ආරක්ෂාවට තර්ජනයක් නොවන බවද ඒ පිළිබඳව ආරක්ෂක අමාත්‍යවරයා සමග සාකච්ඡා පවත්වා ඇති බවද පෙන්වා දුන් ඇමැතිවරයා ලෝකයේ ප්‍රධාන කෝටිපතියන් වන ගූගල් ආයතනයේ සම නිර්මාතෘ සර්ජි බ්‍රින් වැනි අය මෙරට ආයෝජනයට කැමැත්ත පළ කිරීමම රට ලැබූ විශාල ජයග්‍රහණයක් බව පෙන්වා දුන්නා.
මෙම සංචාරයට ආරක්ෂක රාජ්‍ය අමාත්‍ය රුවන් විජේවර්ධන මහතාද සහභාගී විය.
