ඖෂධ, ඉන්ධන, ගෑස් ඇතුළු අත්‍යවශ්‍ය ද්‍රව්‍යවල දැඩි හිඟයක් රට තුළ තිබියදී ඉන්දියාවෙන් ලැබුණ සහනදායී ණය මුදලින් කොටසක් වැයකර රජය විසින් යකඩ තොගයක් ආනයනය කිරීමට පියවර ගෙන ඇතැයි ශ්‍රී ලංකා නීතිඥ සංගමය වෙනුවෙන් පෙනී සිටි ජනාධිපති නීතිඥ උදිත ඉගලහේවා මහතා ඊයේ (05)දින ශ්‍රේෂ්ඨාධිකරණයට පෙන්වාදී තිබේ.
රට තුළ පවතින ඉන්ධන හිඟය නිසා රටේ බොහෝ රෝහල්වල සිදුකරන ශල්‍යකර්ම ඇනහිට රෝගීන්ගේ ජීවිත දැඩි අනතුරුදායක තත්ත්වයකට පත්ව සිටියදී රජය යකඩ ආනයනය කිරීම සඳහා එම මුදල් වැය කිරීමට උත්සුක වී ඇත්තේ ඇයි දැයි දැනගැනීමට පෙත්සම්කරුවන්ට අවශ්‍ය වී ඇතැයි ද ජනාධිපති නීතිඥවරයා එහිදී අධිකරණයට වැඩිදුරටත් පෙන්වා දී ඇත.
රට තුළ මේ වනවිටත් පවතින ඉන්ධන, ගෑස් ඇතුළු අත්‍යවශ්‍ය ද්‍රව්‍ය හිඟයකින් තොරව ජනතාවට සැපයීමට විධිමත් වැඩපිළිවෙළක් සකසන ලෙසට බලධාරීන්ට නියෝගයක් කරන්නැයි ඉල්ලා ශ්‍රී ලංකා නීතිඥ සංගමය විසින් ගොනුකර තිබූ මූලික අයිතිවාසිකම් පෙත්සම් දෙක පී. පද්මන් සූරසේන, ජනක් ද සිල්වා හා මහින්ද සමයවර්ධන යන විනිසුරු මඬුල්ල හමුවේ ඊයේ (05 දා) කැඳවිණි.
එම පෙත්සම් ලබන 12 වැනිදා යළි කැඳවීමට දින නියම කළ විනිසුරු මඬුල්ල එකී අත්‍යවශ්‍ය ද්‍රව්‍ය විධිමත් ලෙස ජනතාවට සැපයීමට බලධාරින් ගෙන ඇති පියවර කුමක්දැයි බලධාරීන්ගෙන් විමසා අධිකරණයට දැනුම් දෙන ලෙසට නීතිපතිවරයාට නියෝග කර ඇත.
එකී වැඩපිළිවෙළ සම්බන්ධයෙන් විදුලිබල අමාත්‍යාංශයේ හා සෞඛ්‍ය අමාත්‍යාංශයේ ලේකම්වරයා මේ වනවිටත් දිවුරුම් ප්‍රකාශ මගින් අධිකරණය දැනුවත් කර ඇතැයි, අතිරේක සොලිසිටර් ජනරාල් නෙරින් පුල්ලේ මහතා විනිසුරු මඬුල්ලට දැනුම් දී ඇත.