මතුගම යටදොලවත්ත රන්දිලවත්ත ප‍්‍රදේශයේ ඉඳිකරමින් පවතින දෙමහල් නිවසක සඟවා තිබූ රුපියල් එක්කෝටි පනස් ලක්ෂයකට අධික වටිනා හෙරොයින් හා අයිස් මත්ද්‍රව්‍ය තොගයක් සමග රිවෝල්වරයක් සොයා ගැනීමට හැකි වූ බව පොලිස් විශේෂ කාර්ය බලකාය කියයි.
එම නිවසේ තිබී හෙරොයින් මත්කුඩු කිලෝ එකයි ග‍්‍රෑම් 55ක්, අයිස් මත්ද්‍රව්‍ය ග‍්‍රෑම් 50ක්, රිවෝල්වරයක් සහ විද්‍යුත් තරාදියක් පොලිස් භාරයට ගෙන ඇත. පොලිස් විශේෂ කාර්ය බලකාය විශේෂ මෙහෙයුම් තුන්වන කණ්ඩායමේ නිලධාරීන් කණ්ඩායමක් විසින් මෙම මෙහෙයුම සිදුකර ඇත. මත්ද්‍රව්‍ය සහ රිවෝල්වරය වැඩිදුර විමර්ශන සඳහා පොලිස් මත්ද්‍රව්‍ය නාශක කාර්යාංශය වෙත භාරදී ඇත. පොලිස් විශේෂ කාර්ය බලකා අණ දෙන නිලධාරී නියෝජ්‍ය පොලිස්පති නීතිඥ වරුණ ජයසුන්දර මහතාගේ උපදෙස් මත පොලිස් විශේෂ කාර්ය බලකා මූලස්ථානයේ විශේෂ මෙහෙයුම් තුන්වන කණ්ඩායමේ ප‍්‍රධාන පොලිස් පරීක්ෂක ඒ.ඒ.පී. සම්පත් මහතා ඇතුළු නිලධාරීන් කණ්ඩායමක් වැටලීම සිදුකර ඇත.