තුර්කියේ රුසියානු තානාපති ඇන්ඩ්‍රෙයි කාලොව් එරට පොලිස් නිලධාරියෙකු විසින් වෙඩි තබා ඝාතනය කරනු ලැබිණ.
කලාගාරයක් තුළ පැවති ඡායාරූප ප්‍රදර්ශනයකට සහභභාගී වී සිටි තානාපතිවරයා පැමිණ සිටි පිරිස අමතා දේශනයක් පවත්වමින් සිටියදී මෙලෙස වෙඩි තබා ඝාතනය කරන අයුරු දැක්වෙන දර්ශන විදෙස් මාධ්‍ය පළ කර තිබේ.
දර්ශනවලට අනුව සැකකාර පොලිස් නිලධාරියා හොඳින් හැඳපැළඳ සිටින අතර වෙඩි තැබීමෙන් පසු පිස්තෝලය ද අතැතිව ප්‍රකෝප ලෙස අදහස් පළ කරනු දැක ගතහැකි ය.
ඝාතනයට සම්බන්ධ නිලධාරියා ඇන්කරාහි කැරළි මර්දන පොලිසියේ 22 හැවිරිදි මෙව්ලට් මර්ට් අයිඩින් ලෙස හඳුනා ගෙන තිබේ.
කෙසේ වෙතත් මොහු කිසියම් ත්‍රස්ත සංවිධානයකට සම්බනධයක් ඇත් ද යන්න සම්බන්ධයෙන් කරුණු හෙළි වී නොමැත.
තානාපතිවරයාගේ ඝාතනය සිදුව ඇත්තේ, සිරියාවේ ඇලැප්පෝ නුවර ප්‍රහාර සඳහා රුසියාවේ මැදිහත්වීම සහ රුසියාව සිරියානු ආණ්ඩුවට සහය දැක්වීමට එරෙහිව පැවති උද්ඝෝෂණයෙන් දිනකට පසුව ය.
