අනුර දිසානායක ණයට ගෙන සහ මුදල් මුද්‍රණය කර ගමට කන්න දෙන පැරණි ක්‍රමයට යළි අවතීර්ණ වී ඇති බවත් මේ ආකාරයටම ඉදිරියටත් කටයුතු කළහොත් යළිත් රට ආර්ථික වශයෙන් කඩාවැටී බරපතළ අර්බුදයකට ගමන් කරන බව නව ප්‍රජාතන්ත්‍රවාදී පෙරමුණේ අනුරාධ ජයරත්න මහතා පවසයි.
යළිත් මේ රට කඩා වැටුණහොත් රටේ පෝලිම් යුගයක් ඇති වීම අනිවාර්ය වන බව ද ඔහු පෙන්වා දෙයි.
රට එතැනට වැටෙන්නට පෙර ආරක්ෂා කර ගැනීමට නම් නොවැම්බර් 14 වනදා පැවැත්වෙන මහ මැතිවරණයේ දී ගෑස් සිලින්ඩරය කණ්ඩායමේ බහුතරයක් පාර්ලිමේන්තු යවා ගෞරවනීය විපක්ෂයක් වෙනුවෙන් ශක්තිය එක්කළ යුතු බව ද අවධාරණය කරයි.
අනුර දිසානායක ආණ්ඩු කරන ආකාරය අනුව තවත් වසර එකහාමාරක් යන තැන මෙරට පාලනය බාරගැනීමට ගෑස් සිලින්ඩරය කණ්ඩායමට සිදුවන බවද ඒ මහතා පෙන්වා දුන්නේය.
හිටපු රාජ්‍ය අමාත්‍ය අනුරාධ ජයරත්න මහතා මේ බව සඳහන් කළේ, මහනුවර ගලගෙදර ප්‍රදේශයේ පැවති ජන හමුවක් අමතමිනි.