පසුගිය ජනාධිපතිවරණය නොපවත්වන ලෙස හිටපු ජනාධිපති මහින්ද රාජපක්ෂ මහතාට තමා ලිඛිතව දුන් උපදෙස් නොතකා ඔහු පරාජයට පත්වෙද්දී ශ්‍රී ලංකා නිදහස් පක්ෂයේ බලය ආරක්ෂා කර ගැනීමට තමා ගත් සාර්ථක උත්සාහය වරදක් දැයි ශ්‍රීලනිපයේ 65 වැනි සංවත්සර උත්සවය අමතමින් ජනාධිපති මෛත්‍රීපාල සිරිසේන මහතා ප්‍රකාශ කර සිටියේය.
ගිලිහී ගිය බලය ශ්‍රීලනිපයට යළි හිමි කර ගැනීමට එජාපය සමග සම්මුතිවාදී රජයක් බිහි කළ බවත්, අනාගත ශ්‍රීලනිප ආණ්ඩුවක් පිහිටුවීමේ පළමු වෙඩි මුරය කුරුණෑගලින් අද ඇරඹූ බවත් ජනපතිවරයා කියා සිටියේය.
එමෙන්ම ලබන වසරේදී අත ලකුණින් පළාත් පාලන මැතිවරණයට තරග කරන බවද ඒ මහතා පැවසීය.
පැලපතෙන්, කුඹුරෙන්, ගොයම් කොළෙන් ආ තමාට අද සමහර පිරිස් හැංගි හැංගී පහර දෙන්නේ තමා ගොවි පුතෙකු නිසාදැයි යන්නත් ඔහු ප්‍රශ්න කළේය.