ප්‍රජාතන්ත්‍රවාදී පක්ෂය විසුරුවා හැර එහි සාමාජිකයන් සියළු දෙනා එක්සත් ජාතික පක්ෂයේ සමාජිකත්වය ගත යුතු යැයි පක්ෂ නායක ෆීල්ඩ් මාර්ෂල් සරත් ෆොන්සේකා මහතා (04දා) පැවති එම පක්ෂ කෘත්‍යාධිකාරි මණ්ඩල රැස්වීමේදී එහි සාමාජිකයන්ට පවසා ඇත. එම තීරණයට කෘත්‍යාධිකාරී මන්ඩල සාමාජිකයන්ගෙන් පිරිසක් දැඩි ලෙස විරෝධය දක්ව ඇති අතර මෙම හේතුවෙන් ප්‍රජාතන්ත්‍රවාදී පක්ෂය දෙකඩ වී කොටසක් එජාපයටද, අනිත් පිරිස එකාබද්ද විපක්ෂයටද දෙකඩ වී යෑමේ තත්වයක් උදාවී තිබෙන බව වාර්තා වේ.
සරත් ෆොන්සේකා මහතාට එජාප යේ ප්‍රබල තනතුරක්ද, එම පක්ෂයේ ජ්‍යෙෂ්ඨයන්ට පුරප්පාඩු වී ඇති එජාප යේ ආසන සංවිධායක ධුර සහ ඉදිරි මැතිවරණවලදී තරග කිරීමට අවස්ථාව දෙන බව පොරොන්දු වී ඇති බැවින් පක්ෂය විසුරුවාහැර සියලු දෙනා එජාපය එක්විය යුතු පක්ෂ කෘත්‍යාධිකාරී මණ්ඩල රැස්වීමේදී ෆොන්සේකා මහතා පවසා ඇත.
ඒ අනුව එකඟතා ලියවිල්ලක් මත මේ මස අග සතියේදී එක්සත් ජාතික පක්ෂය සමග එක්වීමට නියමිත බවට ෆොන්සේකා මහතා සඳහන් කළ අවස්ථාවේදී බහුතර කෘත්‍යාධිකාරී සාමාජිකයන් පිරිසක් එම තීරණයට කැමැත්ත ප්‍රකාශ කර තිබෙන අතර, ඉතිරි තවත් සාමාජිකයන් පිරිසක් ඊට විරෝධය පළ කර තිබේ. එක්සත් ජාතික පක්ෂය සමග එක්වන පිරිස එජාප සාමාජිකයන් ලෙසද, මෙම තීරණයට විරෝධය පළ කළ පිරිස ඒකාබද්ධ විපක්ෂයටද එක්වන බවට ප්‍රකාශ කර ඇති බැවින් ඉදිරියේදී ප්‍රජාතන්ත්‍රවාදී පක්ෂය නමින් දේශපාලන පක්ෂයක් නොපවතින බවයි එම පක්ෂ අභ්‍යන්තර ආරංචි මාර්ග සදහන් කරන්නේ.