සිංගප්පූරුවේ මවුන්ට් එලිසබත් රෝහලේ පසුගිය දා බයිපාස් සැත්කමකට භාජනය කරනු ලැබූ සෞඛ්‍ය අමාත්‍ය රාජිත සේනාරත්න මහතා එම රෝහලෙන් ඉවත්ව යන දා ඔහුට සුවය පැතීම සඳහා ශ්‍රී ලංකාවෙන් 140 කට අධික පිරිසක් එම රෝහල වෙත ගොස් ඇති බව වාර්තා වේ.
මෙයින් වැඩි පිරිසක් රෝහල කරා ගොස් ඇත්තේ ඇමතිවරයාගෙන් ලකුණු දමා ගැනීම සඳහා බව වැඩි දුරටත් අනාවරණය වේ. ඇමතිවරයාට මූණ පෙන්වා එක දමා ගැනීමෙන් පසු මොවුන්ගෙන් බොහෝ දෙනා සිංගප්පූරුවේ ‘Marina Bay’කැසිනෝ හලේ දැකගත හැකි වී තිබේ. මොවුන්ගෙන් බොහෝ දෙනෙකු කුප්‍රකට සූදු කප්පිත්තන්ය.
මෙසේ අධික අමුත්තන් සංඛ්‍යාවක් එක් රෝගියෙකු බැලීම සඳහා පැමිණීමේ හේතුවෙන් රෝහල් බලධාරීන්ට විශාල ප්‍රශ්නයකට මුහුණ දීමට සිදුවූ බවද වාර්තා වේ. එසේ හෙයින් දිනකට අමාත්‍යවරයා බැලීමට පැමිණෙන සංඛ්‍යාව සීමා කිරීමට මවුන්ට් එලිසබත් රෝහලේ පාලනාධිකාරියට සිදුවී තිබේ.
සෞඛ්‍ය අමාත්‍ය රාජිත සේනාරත්න මහතා මේ වන විට රෝහලෙන් ඉවත්ව ගොස් ඇති අතර වැඩිදුර විවේකය සඳහා රෝහලට යාබද ‘යෝක් හොටේල්’ අසල සුපිරි නිවාස සංකීර්ණයක (Luxury apartment) ලැගුම් ගෙන සිටී. තව මාසයක කාලයක් පමණ මෙසේ විවේකයෙන් සිටිය යුතු බවට සේනාරත්න මහතාට හෘදය විශේෂඥයින් උපදෙස් දී ඇත.
Lankanewsweb