2021-2022 මහ කන්නයේ දී වගා හානි සිදුවූ ගොවීන්ට රුපියල් මිලියන 657ක මුදලක් කෘෂිකාර්මික හා ගොවිජන රක්ෂණ මණ්ඩලය විසින් වන්දි වශයෙන් ලබා දී තිබේ.
කෘෂිකර්ම, වනජීවි හා වනසම්පත් සංරක්ෂණ අමාත්‍යාංශය සඳහන් කළේ නියඟය, ගංවතුර හා වන අලි මගින් වගාවන්ට සිදුවු හානි සැළකිල්ලට ගනිමින් මෙම වන්දි මුදල් ප්‍රදානය කිරීමට පියවර ගෙන ඇති බවයි.
මේ යටතේ ගොවීන් 31,613 කට අක්කර 42,934 ක් සඳහා වන්දි ලබා දීමට කටයුතු යොදා තිබෙන අතර ඉන් වැඩිම වන්දි මුදල් ප්‍රමාණයක් හිමිවන්නේ අනුරාධපුර දිස්ත්‍රික්කයටයි.
එම දිස්ත්‍රික්කයට රුපියල් මිලියන 81ක්, පොලොන්නරුවේ මනම්පිටියට රුපියල් මිලියන 69ක්, මොනරාගලට රුපියල් මිලියන 68ක් ද වශයෙන් වන්දි ලබා දී තිබේ.
මේ අතර බෝග වර්ග හයක් සඳහා අක්කරයකට ලබා දෙන රක්ෂණ මුදල රුපියල් ලක්ෂය දක්වා ඉහළ දැමීමට තීරණය කර ඇති බවද අමාත්‍ය මහින්ද අමරවීර පවසයි.
වී, බඩඉරිඟු, අර්තාපල්, මිරිස්, ලොකු ළූනු, හා සෝයා බෝංචි සඳහා වගාහානි ලබා දීමට මෙම රක්ෂණ ක්‍රමය මගින් සැළසුම් කර ඇති බව ද සදහන් ය.