රාජ්‍ය සේවකයින්ගේ කාර්යාල ඇඳුම් සම්බන්ධයෙන් පසුගියදා රාජ්‍ය පරිපාලන හා ආපදා කළමණාකරන අමාත්‍යංශය නිකුත් කළ චක්‍රලේඛය අහෝසි කළ බව කැබිනට් නොවන අමාත්‍ය හර්ෂ ද සිල්වා මහතා පවසනවා.
සිය ට්විටර් ගිණුමේ පණිවුඩයක් තබමින් ඒ මහතා මේ බව කියා සිටියා.
රාජ්‍ය පරිපාලන අමාත්‍යංශයේ ලේකම් ජේ.ජේ රත්නසිරි මහතාගේ අත්සනින් යුතුවයි අදාළ චක්‍රලේඛය නිකුත් කර තිබුණෙ.
ඒ රාජ්‍ය ආයතනවල ආරක්ෂාව තහවුරු කිරීමේ අරමුණින්.
එම චක්‍රලේඛය මගින් රාජ්‍ය ආයතනවල පිරිමි පුද්ගලයින් කලිසම හා කමිසය හෝ ජාතික ඇඳුම ද, කාන්තාවන් සාරිය හෝ ඔසරිය ඇඳිය යුතු බව ද එහි දක්වා තිබුණා.
කෙසේ වෙතත් හර්ෂ ද සිල්වා මහතා කියා සිටියේ, තමා ඇතුළු පිරිසකගේ විරෝධතාවය හමුවේ ජනාධිපති ලේකම්වරයාගේ උපදෙස් මත එම චක්‍රලේඛය ඉවත් කළ බවයි.