ශ්‍රී ලංකාව සම්බන්ධයෙන් සිදුකිරීමට නියමිත දේශීය යාන්ත්‍රණය ක්‍රියාත්මක කිරීමෙහිලා වත්මන් ආණ්ඩුවට සහයෝගය අවශ්‍ය බවත්, ඒ සඳහා සියලූ දෙනා කැපවිය යුතු බවත් ගෝලීය දෙමළ සංසදය පවසයි.
එම සංවිධානයේ ප්‍රධානී එස්.ජේ. ඉමානුවේල් පියතුමා සඳහන් කරන්නේ, යෝජනාව ක්‍රියාත්මක කිරීම පිළිබඳ ශ්‍රී ලංකා ආණ්ඩුවේ කැපවීම හා සූදානම අගය කළ යුතු බවයි. ජනතාවට සහජීවනය උදාකරලීමේ අරමුණින් සත්‍ය ප්‍රකාශ කර, සම්මත කරගනු ලැබූ එම යෝජනාව පිළිබඳ සතුටු විය හැකි බව ඔහු අවධාරණය කරයි.
එම යෝජනාව සම්මත කිරීමටත්, ඉදිරිපත් කිරීමටත් කැපවූ මානව හිමිකම් කවුන්සිලයේ මහකොමසාරිස් සෙයිඞ් අල් හුසේන්ට ප්‍රසාදය පළ කරන බවද හෙතෙම සඳහන් කරන අතර ආණ්ඩුවේ ඇතැම් කටයුතු කෙරෙහි විරෝධය පළ කරන පුද්ගලයන්ට සත්‍ය පසක් කර දීමට වත්මන් ආණ්ඩුව කටයුතු කළ යුතු බවද ඔහු කියා සිටී.